2008 年 6 月 13 日《經濟日報》「關人馬事」專欄:
飛過抑鬱森林 (活力先生)
自從我阿活公開自己患精神抑鬱嘅經過,再加上「大姐明」林建明搞「心晴行動基金」,不少精神抑鬱及各類驚恐症人士,紛紛 come out ,唔再覺得呢個係不能見光之恥辱。
病啫,只要搵啱醫生,按時食藥再調節思想行為,以及生活節奏,就可能有救。
抑鬱症最攞命嘅係無色、無味、無傷口,故甚難得到別人嘅同情,病者只能有苦自己知。
苦苦吓,思想必鑽牛角尖,開始感覺孤單、無助,然後認定自己為人間垃圾,累街坊、累家人,唔死無用。若無適當治療,最終會一個又一個咁自行了斷。
各位,假若你或身邊親友,最近有心緒不寧、精神不振、疲倦、無活力、覺得身體機能大幅衰退、對社交及工作興趣急降等等現象,切勿掉以輕心。
今日小弟介紹你睇一本書《飛過抑鬱的森林》,內裏最寶貴一章,乃「抑鬱症自我測試」,由香港健康情緒中心及美國精神學會專家提供。事實,若十年前我接受此測試,起碼少受痛苦煎熬八、九年。
因為,測試十分詳盡,對抑鬱症描述百分百精準,呢呢呢,內容十二項,我曾經全中!
《飛過抑鬱的森林》有十一個訪問,讀後令人動容!尤其是醫生自己中招之余枝勝醫生。余醫生乃著名精神科專家,但不能倖免,也曾被困抑鬱苦海,是否有點匪夷所思?
另外,「武俠影后」徐楓之子湯珈鋮,十七歲已痛不欲生,原來抑鬱狂魔襲人係不限年齡!
開卷有益,我阿活瞓身推薦《飛過抑鬱的森林》,因有機會從自殺邊緣救番唔少人!
回到 : 《飛過抑鬱的森林》評論報導